مفيش في مرة كده تخيلت نفسك كبرت؟..اكيد كلنا فكرنا نكبر لما كنا صغيرين عشان نستمتع بفترة الشباب اللي بيقولو عليها دي...يعني لما كان الواحد في ابتدائي كان بيقول ياااااه العيال بتوع تالته اول اعدادي دول جامدين اوي...نفسي ادخل اعدادي بقي والعب كورة زيهم..ولما دخلت اعدادي جم العيال بتوع ثانوي وعملوا عليكو فردة و طلعوكو م الملعب...وقفت بره تجز علي سنانك و تقول يا ولاد اللذينا!!نفسي ابقي ف ثانوي بقي...بقيت في ثانوي ؛وفي مرة وانت واقف في البلكونة وماسك كتاب الفيزيا شفت احمد جاركو في تانية كلية ملهاش ملامح ,لقيتو واقف ف البلكونة بيسبل لمني جارتكو اللي معاه في نفس الكلية_اللي ملهاش ملامح برضو_والاتنين مش ف دماغهم مذاكرة ,وانت يا عيني ماسك الكتاب و مانع نفسك بالقوة من فكرة الانتحار(باعتبار ان اي حد في ثانوي و واقف في بلكونة لازم الفكرة دي تراوده)..ساعتها قلت في عقل بالك :ياااه ادخل الجامعة انا بس وهقضيها بالطول وبالعرض,هيلموني من علي ارصفتك يا مصر....دخلت الجامعة,وابتديت للاسف تفهم اكتر الحياة ماشيه ازاي...ابتدي فكرك ينضج من غير ما تاخد بالك,ولقيت احلامك بتكبر معاك,..قلت ياااااه لو اكبر كده مثلا لحد سن الثلاثين والاقي كل احلامي اتحققت:العروسة(او العريس..بس طبعا البنت عند سن 20مثلا..كويس 20 ولا ايه؟؟)والعربية والشقة اللي ديكوراتها مش عارف عاملة ازاي و و و.......بس فيه حد فيكو حلم ان عندوا مثلا 80سنة..ياااااااااااه ...دنا هبقي كبير اوي..اوصفلك الموقف؟...بسيطة هتبقي قاعد نفس القعدة,بس هتكش في بعضك شوية,وفجأة كده_فجأة ايه ؟؟اكيد ببطيء طبعا, بقولك 80 سنة_ تقوم مطلع جهاز صغير من جيبك وتقول "اعملي شاين ان ع الفيش بوك يبني لو شمحت"..اول ما تدخل هتكرر غلاستك المعتادة وتقولو"يااه البت شامية دي حلوه اوي...ابعتلها فريند ريكويشت يبني"...تصورتو الموقف؟
اهو انا بدعي دايما ان الواحد لا يرد الي ارزل العمر..او حتي لو ده حصل ,يبقي الواحد عمل حاجة في حياته نفعته ونفعت اللي حواليه...ايه رأيك في نفسك وانت جراند فازر..وانتي اخبار المرايه ايه وانتي جراند مازر؟؟
المهم..تعالوا شاركونا حلمنا هنا و ساعدوني فيه
الثلاثاء سبتمبر 16, 2008 2:46 am
