يا صباح الخنقه

ناس كتير بتجرى فى كل اتجاه - مافيش حد عارف يحدد اتجاه - الكل بيجرى بس - كل الناس بتعيّط – ماحدش بيضحك وماحدش عارف هو رايح فين – لأن من فتره صغيره يمكن تكون بكره – أو بعده أو كمان شهر أو اتنين كانو وصلو لمرحله صعبه جدا – كانو وصلو انهم بيموتوا بعض لمجرد انهم يموتوا بعض – هو ده كان الهدف الوحيد – وكترت السرقه والاغتصاب وبقى السايد هو كل شئ مؤذى – كل الجناين بقت خرابات – كل اللى كان بيموت كان كفنه بيتسرق – كل اللى كان بيموت كانت جسته بتتسرق وتتفرم وناكلها بعد ماخلّصنا كل الحمير والكلاب – ما بقاش فاضل غير الفيران والارانب – كلهم حفروا جحر واستخبوا – كل الناس شالت سلاحها ومشيوا يموّتوا بعض – ناس كتير قوى وهى بتموّت فى بعض كانوا بيفكّروا ف حل للى بيحصل – ما لقيوش – بس فيه واحد مجنون كان بيمشى فى الشارع يكتب ع الحيطه وكل الناس كانت بتحبه وتثق فيه زمان ودلوقت بقوا يثقوا فيه بس قالّهم انا عندى حل – كلهم اتلمّوا عليه عشان يعرفوا الحل – قالهم استحملوا طول الاسبوع – ماحدش يتعب – ماحدش يموت – ماحدش يزعل – ماحدش يحس بالجوع – ماحدش يزعل لو حد موّته أو موّتله حد – كلّه يفتح بقه كأنه بيضحك – كلّه ياكل زبالته – ونسميه عيد الحزن – ومن ساعتها بقى فيه يوم فى الأسبوع اسمه يوم الحزن – كل اللى بيموت بيندفن فى اليوم ده – كل اللى بيحزن حزنه بيبان فى اليوم ده – كل اللى بيموت م الجوع بيموت ف اليوم ده – كل اللى بيسرق كفن بيسرقه فى اليوم ده – كل الفيران بقت ماتستخباش غير اليوم ده – الحمير والكلاب زادوا وبقوا أكتر من الناس – الناس عددها بقى يقل بعد اليوم ده – الطاعون انتشر بغباء – الناس بقت تجرى ف كل اتجاه – مابقاش فيه حد عارف يحدد اتجاه – الكل بيجرى بس – كل الناس بتعيّط – ماحدّش بيضحك وماحدّش عارف هو رايح فين – الراجل المجنون اتقتل واتعملّوا مقام عشان الناس تزوره – كل الناس بتصرخ – كل الناس بتحتفل بعيد الحزن

(منقول)

توبيك هايل
جزاك الله خيرا علي اختيار مواضيعك