حوار مع مجرم فى اتوبيس ( قصة واقعية)

موقف حصلى والحمد لله طلعت منه سليم

هحكيلكو من الاول


وانا مسافر الاسبوع اللى فات القاهرة فى السوبر جيت بعد ما قطعت التذكرة فى المقعد رقم 14

دخلت الاتوبيس وقعدت فى مكانى عاااادى جداااا

طبيعى بصيت على اللى قاعد جنبى وياريتنى ما عملتها

لانى لقيت واحد وشه عبارة عن تقسيم سكنى متكامل من شوارع ومجارى ( وش اجرام وش يعنى)

واول ما بصيتله قاللى هو الساعة كام

عادى جدا

رديت : الساعة 9

ووبسرعة غيرت وشى النحية التانية وانا بقول استر يارب

لقيته سالنى سؤال تانى

طب هو الاوتوبيس هيوصل امتى وكام سؤال من العاديين دول

مفيش مشاكل

وبرضه لفيت وشى وقلت ( بينى وبين نفسى طبعا) ياعم اسكت بقى وابعد عنى


بس شكله كان ناوى يضرب معايا دور صداقة بقى ولقيته فجاة كدة بيقولى :

المجرم: انت عارف.... انا لسة خارج من المعتقل.

يالهوى يالهوى من اولها معتقل ( واحد بيفتح كلامه مع حد ميعرفوش يقوله انا كنت فى معتقل امال هيقول بعد كدة ايه)


بس قلت اكمل معاه واشوف ميته ايه

سالته : طب كنت فى المعتقل ليه

المجرم: سمعت عن المحكمة اللى انفجرت فيها قنبلة فى كفر الشيخ؟؟

انا: لا مش واخد بالى

المجرم: اهو انا بقى اللى عملتها .

الحقينى ياااااااماااااااااااا

انا : طب فجرتها ليه؟

المجرم: اصل اتحكم عليا فى قضية كدة ظلم


انا : بس ازاى كنت فى المعتقل فى قضية زى دى وخرجت بسرعة كدة؟

المجرم : انا دخلت السجن وخرجت على ذمة القضية بس فجاة وانا فى الشغل ( نسيت اقولكو انه شغال بنااااااء) جت ناس غريبة خطفتنى وخدونى على المعتقل

وقعد يحكيلى عن التعذيب فى المعتقل والضرب بمواسير المية وورانى جرح فى شفته 3 غرز من ضربة بالماسورة

انا بينى وبينكو بدات اتعاطف معاه ونسيت موضوع الاجرام دة
وقعدت اشتم فى امن الدولة والتعذيب اللى بيعملوه مع الناس

لحد ما لقيته بيقولى

المجرم : بس عارف بعد دة كله انا مقولتلكش حاجة

انا : ايه

المجرم: انا بشتغل دلوقتى فى الحرس الجمهورى

** طبعا انا قلت دة اكيد شارب حاجة دة ولا عامل دماغ دة ولا ايه وقولت عديها متقفلش مع واحد زى دة وتعمل نفسك سوبر هنيدى معاه

** شوية ولقيته بدا يحكيلى عن تاريخه الاجرامى وقسمهولى كالتالى

من سن 19 -21 ..... سرقة . ونهب ومية نار وبلطجة وحاجات من دى ( انعم واكرم)
من سن 21-24 ...... تجارة الحشيش والمخدرات وما خفى كان اعظم
اتجوز عند سن 24 وبدا يتوب وعند طفل اسمه احمد ( مصمم انى احضر عيد ميلاده)




*****والله مجرم ونزهى

ملحوظة ... هو عنده 25 سنة

*************طبعا انا سمعت التاريخ الاجرامى الحافل والمثير دة وركبى بدات تخبط فى بعضها

المهم لما عرف انى فى كلية طب لقيته بيقولى

المجرم : ايوة ياعم انت فى طب وانا بشتغل بنا ( عامل بناء)

ااااااااااااااه هنبدا الحقد الطبقى اهه ومبررات الجريمة بدات تتجهز

انا : كل واحد بياخد نصيبه

المجرم : بس انت عارف انا كان نفسى ابقى ايه؟؟؟

تخيلو انتو

كان نفسه يبقى وكيييييييييل نياااااااااابة ( حكم)

المهم

كان فيه واحد فى الكرسى اللى قدامنا لابس بدلة وراجل شيك جدا ومعاه شنطة سمسونيت

فلما وصلنا عند طنطا الراجل دة قام ينزل

فلقيت صاحبنا قام وقاللى انا هنزل طنطا وهاخدها مشى لحد القاهرة ( هههههههههههه والنعمة عبيط)

ومشى ورا الراجل وهو ماشى فى الاوتوبيس لحد الباب

وفجاة ....


لقيته راجع تانى


سالته : رجعت ليه؟؟؟؟؟

قاللى : لا اصل السواق قاللى ان طنطا فاتت ( هههههههه وهيا طنطا)

المهم لقيته بيقولى : انت عارف الراجل اللى معاه الشنطة دة

انا : هااااا

المجرم: الشنطة فيها 4 مليون جنيه ( فكيك اوى شافهم والشنطة مقفوله)

فانا قلت يلا عدى دى كمان

المهم قلتله انا لحد دلوقتى معرفتش اسمك ؟؟

المجرم : بص اسال فى اى مكان عنى فى البلد وقول بس هيما طبنجة ( لا مجرم مجرم حتى فى الاسم كمان)

المهم انا قلت انا هقفل معاه بقى واخلص من الحوار دة
فقولتله فرصة سعيدة يا استاذ طبنجة ... بس انا عايز اقولك انى منمتش من امبارح فممكن بعد اذن سيادتك( لازم طبعا) ممكن انام شوية

يدوب حطيت السماعت بتاعة الموبايل فى ودانى ولقيته بيقولى :

المجرم : هو الموبايل دة اسمه ايه؟؟؟ وحلو وغالى ولا ايه نظامه؟؟؟؟؟؟


بسسسسسسس دة جايلى انا بققققققققققققى
انا : لا خااااااالص دة موبايل من ايام حرب المعيز وميساويش خمسين جنيه دة لو حد وافق يشتريه منى

لقيته سالنى بقى سؤااال خلانى قاعد ركبى بتخبط فى بعضها ههههههه

المجرم : الا انت ممكن تسد لو حد حاول يثبتك وياخد منك فلوس ؟؟؟

انا : ( بكل ثقة ..معرفش جت منين ): هع هع لا عيب عليك دة احنا جدعان اوى والدنيا دايسة على دماغنا بالجزمة هههههههه( وانا غلباااااااااااااااان )

المجرم: يعنى لو انا فتحت عليك مطوة يعنى هتسد معايا ؟؟؟؟

يالهوى يالهوى هيا فيها مطوة دة انا بخاف من الموس حد يلحقنى باسعاف يا جدعان

انا : ههههىىىىهههههههىىىىى ضحكة عبيطة من بتوع عادل امام ....طب ياعم انت واحد عمال تتكلم عن الرجولة بقالك ساعة... هتفتح مطوة على واحد قاعد معاك فى كرسى واحد وفى اتوبيس واحد لمدة ساعتين

المجرم : لا دة انا بهزر بس

الحمد للله هييييييييييييييه

بس برضه الفار بدا يلعب فى التيشيرت وقولت انا لازم اخلع منه

فقولتله طب ممكن انام

المجرم:اه معلش انا عارف انك صدعت منى ... بس لو احتجت منى اى خدمة انا تحت امرك حشيش.. افيون ..خناقات .. دكتور مضايقك فى الكلية قوللى بس وملكش دعوة


انا : الف شكر يا باشا شايلينك للتقيل .. الحاجات دى بسيطة ههههههههههه( وانا غلبااااااان )

المهم وهو بيكلمنى لقيته بيتاوب كدة

قولتله على طول : انت شكلك انت كمان تعبان ... متنام انت كمان

واول ما نام رحت واخد ديلى فى سنانى وراجع على كرسى ورا وقعدت اعد فى صوابعى والفلوس اللى فى جيبى وحتى على زراير الموبايل

والحمد لله جت سليمة


تفتكروا فعلا دة حرامى ولا ايه ؟

ولو اتعرضتو لموقف زى دة هتعملو ايه ؟

منتظر ردودكو

ههههههههههههههههه
حلو قوى الموضوع ده ولو حصل معاك فعلا وكان ده تصرفك يبقى تماام جدا
الحقيقه انا لو مكانك بعد السكته اللى كانت هتجيلى كنت فعلا هانزل واكمل الطريق مشى
يالهوى انا يحصلى كده اقعد مع طبنجه فى كرسى واحد ياخراشى ياخراشى
الحمد لله لابروح القاهره ولابركب سوبر جيت ههههه

لا الموضوع جميل اووى

والاجمل تعليقاتك

وانا من رأى ان واحد زى ده اكيد مجرم والا ايه اللى يستدعيه يقول الحاجات دى كلها

او بقى عبيط وبيستهبل

بس انا ساعتها بجد مش عارفة كنت حعمل ايه

بس احتمال اهاوده للنهاية زى انت ماعملت كده
دى اسلم طريقة للخروج من المأزق ده

ربنا يستر علينا

بس بجد هاااااااااااااااااااااااايل الموضوع والاجمل فيه انه حقيقى

حتشبسوت كتب:

ههههههههههههههههه
حلو قوى الموضوع ده ولو حصل معاك فعلا وكان ده تصرفك يبقى تماام جدا
الحقيقه انا لو مكانك بعد السكته اللى كانت هتجيلى كنت فعلا هانزل واكمل الطريق مشى
يالهوى انا يحصلى كده اقعد مع طبنجه فى كرسى واحد ياخراشى ياخراشى
الحمد لله لابروح القاهره ولابركب سوبر جيت ههههه

بس طبنجة من كفر الشيخ

هما كلها كام يوم هيخلص تدريبه لقوات الحرس الجمهورى ( ربنا يستر على مبارك)

ويرجع كفر الشيخ وينتشر فى السيرفيسات

وهيبقى مفيش مفر

نونا كتب:

لا الموضوع جميل اووى

والاجمل تعليقاتك

وانا من رأى ان واحد زى ده اكيد مجرم والا ايه اللى يستدعيه يقول الحاجات دى كلها

او بقى عبيط وبيستهبل

بس انا ساعتها بجد مش عارفة كنت حعمل ايه

بس احتمال اهاوده للنهاية زى انت ماعملت كده
دى اسلم طريقة للخروج من المأزق ده

ربنا يستر علينا

بس بجد هاااااااااااااااااااااااايل الموضوع والاجمل فيه انه حقيقى

شكرا يا نونا على رايك

وربنا ما يوقعك فى موقف زى دة

هيما طبنجه او شوشو طبنجه
معارف قديمه
عيال زى العثل بس للاسف الاجرام في دمهم

انت كده اثبت ان تربيتى و مشروعى بتخريج شباب جامد نجح

جميله القصه جدا بس هو اكيد واحد بيتعلم الاجرام ومش عارف
لان دايما اللي بيبقي عاوز حاجه ومش طايلها وبيبقي معقد نفسيا

بيقول حاجات ةينسبها لنفسه ماحصلتش

( لان مافيش انفجار حصل في محمكمه كفر الشيخ اصلا )
هههههههههههههه

دي كانت يدوب اشاعه

هو بس بيتعلم صياعه جديد وشافك واد جنتل فقال اترسم عليه

بس الصراحه عجبتنا لانك علمت عليه

وطلعت اصيع منه

ههههههههههههههههههههههههههههههههههههههههه

بجد موضوع جميل هههههههههه ويالة مش مشكلة تسلم ايدك

بس بجد طريقتك فى الكلام معاه تموت من الدحك

وانت عاملى فيها الواد الفتك اللى مش فى حد زية

ههههههههههههههههههههههه

اعليه المعلى
على فكرة موقفك كان جامد اوى يا قهوجى
ومن امتى الشجاعة دى
تعرف انا لو مكانك بعدك كده مش هسافر لوحدى
هاخد حد معايا علشان الكرسى اللى جمبى يبقى مليان
ولا اشوف طبنجة ولا مسدس حتى

فكرة برضه يا انجل



شكرا يا دودو (اى خدعة)




القلب الطيب


ايوة طبعا اصله ميعرفش ان الصياعة ادب مش هز اكتاف

angel of magic كتب:

اعليه المعلى
على فكرة موقفك كان جامد اوى يا قهوجى
ومن امتى الشجاعة دى
تعرف انا لو مكانك بعدك كده مش هسافر لوحدى
هاخد حد معايا علشان الكرسى اللى جمبى يبقى مليان
ولا اشوف طبنجة ولا مسدس حتى

انت ممكن تاخدي اخوكي معاكي وهيكون افضل لو مسافرتيش




قهوجي الاول واحد نسكافيه
طبنجة بيه اكيد راجل مهم في الحرس الجمهوري
فياريت تبطل تسييح عشان خاطر القهوة دي ناس بتاكل منها عيش وانت اولهم
يرضيك صاحب القهوة بتشرد والعيال وامهم
بس جامد الحوار ده يامان

بص انا ممكن اخد القهوجى معايا علشان لو قابلت طبنجة يتصرف هو
ولا اقولك ما اخدك انت واريح دماغى

طيب هو طبنجه ده فرنساوى ولا المانى