الطريق إلى أجــــوجـــــو !! "ترقبوا مغامرات الغولة وابو كافولة!"

كعادة كل يوم.. استيقظ..اتوضأ واصلى..واذهب الى عملى..افتح صفحات النت سريعا..فربما يلهمنا الله مابين الليل وقتما قفلت النت والصباح..صفقة فى الفجر..فأجد العكس تماما..اجوجو مش جى..شوية امير اتقمص وقفش وجرى..زاكيرونى عاوز بسين فى نص الملعب و2 مليون يورو فى السنة ومش جى ..مفيش صفقات سوبر ولا كيلوباترا حتى..كل الموضوع ان يصبح على صديقى العزيز شريف محرز متتريقا..متألسا ..متشامخا بصفقاته كأهلاوى قائلا..امال اجوجو فين يا ريس!!

لا ادرى..كلما فتحت "الوورد" الافرنجى الاختراع..لاكتب شيئا..صمت كيبوردى..وذهب الملف"للريسيكل بين"..يتصل بى زميلى العزيز عمرو الجدع من السعودية..فين مقالاتك يابنى..واقسم انه من نهائى الكأس ولا اجرأ ان اكتب حرف..ولا امتلك اى نفس فى ان اكتب ولو حرف..فكلما جاءت صفقة عكر مزاجها الاخرى..وكلما اقتربت الانتخابات كلما زهقنا من الحرس القديم..وزهقت من نفس سياسة العشوائيات فى الانتخابات..والنهاية اخبار وقتما نتفائل بها..وقتما نتنكد سريعا!!

منذ اسبوع ونصف..بدأت اكتب مقال بعنوان.."من النهاردة مفيش اجوجو..انا اجوجو"..مستوحاه من فيلم الجزيرة..شعرت اننى سألبس وجه اجوجو وسأخرج للشارع ذاهبا لنادى الزمالك قائلا هذه الجملة.. لقد جاء اجوجو فى وقت نشتاق الى مهاجم من طراز الماكينات البشرية..حفظه الله من العين الحمراء.. وجاءت خطة وصول اجوجو بطريقة فيلم..الطريق الى ايلات..حتى شعرت اننا فعلا فى هذا الفيلم بحذافيره.

فاللاعب غانى..ذهب عن طريق الامارات..وعمل ترانزيت فى البحرين..وركب طيران خليجى..وشرب سيجار هندى..ولبس تى شيرت امريكى الصنع و نظارة بوليس صينية الصنع..وكوتشى تايلاندى النشأة ووصل الطائرة بعد تكتم الجميع على وصوله..ووصل اجوجو..ومسك التى شيرت..على رأى الاستاذ الظريف لطيف الدم خفيف الافيهات رائد مقالات فى العارضة.. وكان المشهد بالفعل متحفظا عليه فلايحدث ابدا لاعب يأتى للتفاوض نديله تى شيرت نقوله فرح العيال لاننا اكبر من ذلك..فاسم الزمالك سيضيف لاجوجو..اكبر من ان يقف الزمالك على لاعب!!

راح اجوجو الفندق..واستمرت الكاميرات تصور الاحداث..اجوج فى التواليت الساعة خمسة..فى اوضة مكيفة تكييف كاريير..بيحب السيجة الهندى..حلق حلاقة قرعاء الشكل..لبس تى شيرت لاتينى الماركة ونزل يتفاوض..اجوجو عجبه الزمالك..اجوجو حب النادى..اجوجو اشاد بالبسين..اجوجو حب الشاورمة اوى.. اجوجو قال انه زمالكاوى منذ الصغر.. يتبعه فجأة..اخبار من الطرف الاحمر..البدرى يصرح..اجوجو مين و الناس نايمين..اجوجو ده اساسا سيونى التشجيع..اجوجو ده عنده عيب خلقى ورا ودنه.. احنا مش عايزين اجوجو..وامتلأت منتديات الاهلى شتيمه فى اجوجو..وكلام غريب!

وشارك جمهور الزمالك فى الفرحة..اجوجو ده اساسا مفيش زيه..اجوجو ده بصه يعنى غانا ماجبتش غيره و غير عبيدى بيليه..ده الصفقة السوبر والله يخرب بيت ده كلمه..والمهم اننا انتظرنا ما سيحدث!!
اجوجو مضى..لا لسه..مضى..لسه..مضى..اه بس فى غانا..ليه..عشان يسأل الماماتو بتاع الهو.. وقيل انه اسلم ليصلى صلاة استخارة!!..وذهب اجوجو للجابون..ولعب ماتش الجابون..وفازوا ماتش الجابون.. وخلصوا ماتش الجابون..وانتظرنا وصوله من الجابون..ولكن لا ظهر اجوجو ولا جاب حتى جون!!

يا ناس اين اجوجو..ناس قالت انه فى روسيا بيصيف..وناس قالوا فى السعودية بيزور اخته..وناس قالت انه فى الامارات بيمضى للعين..ناس قالت انه مش عايز الزمالك..وناس قالت انه حيكمل فى اوروبا.. و النهاية..نو اجوجو غلطة وبدفع تمنها غالى!!

اصابنى الاحباط بزيادة..فانا اريد استقرار للنادىولست مع اى مرشح..ولكن ضد الكثيرين..لذلك تمنيت من كل قلبى ان يستمر عباس..فليس من المعقول اننا فى كل شبر فى مصر يستمر اى رئيس لاى مؤسسه او مصلحة او اى شىء..وابعدونى عن السياسة الله يخليكوا..الا نادى الزمالك..ونفاجأ بعدها بالا يرأس الزمالك رئيس نادى لمدة 4 سنين..اتمنى من القلب ان يفهم المشجع الزمالكاوى اننا نتمنى استقرار وان يستكمل المسيرة قائد فترة..ولن ازيد لان كلامى واضح..وهو بين السطور من ارشحه!!

وجاء زاكيرونى وقتما وصل اجوجو..ورحل زاكيرونى..ثم قيل ان الاسماعيلى بيفاوض هولمان وفجأة الاسماعيلى ادارته رحلت..ففاوضناه..ومضى هولمان..اعترض فقط على طريقة التفاوض..انما اؤيد هولمان لخبرته بمصر ومعرفته يعنى ايه اهلى وزمالك..ويعنى ايه اسماعيلى..ويعنى ايه مصر..بالاضافة لنجاحاته الخليجية..والوقت النتبقى لزمن امتحان الاهلى اصبح قليلا..وهو المدرس الخصوصى الوحيد الذى ربما سيجل ورقة الاسئلة واضحه بعض الشىء.

اليوم..استيقظت ..توجهت لعملى..فتحت النت..تصفحت الصفحات..لافاجئ على صفحات المواقع بأن أجوجو في الزمالك..يا نهار ابيض..على طريقة..ياناس يا عسل..اجوجو وصل..لم استطيع ان اخفى دهشتى..اجوجو..امال كنا بنعزى فى مين..والميت اللى كنا بنعزى عليه..ماطلعش هو.. وقرأت طرق لوصول اجوجو الى الزمالك..على طريقة فيلم الطريق الى ايلات بدون اى مبالغة.. من رأس الرجاء الصالح..الى القاهرة.

اليوم فقط..ابتسمت..واصبحت اصابعى مشتاقة ان ترسم قبلات متتالية على حروف الكيبورد.. بل ان كل حرف كان يتسابق فى ان ياخذ المزيد والمزيد من قبلات اجوجو..لقد قررت فقط الان ان اكتب.. وان اقول لمن قال الواد مسك التى شيرت والواد مسك العفريته حتى..لماذا الشماته فى الزمالك بهذه الطريقة.. ولماذا لا تراعون الله فى طريقة لعب بالمشاعر الزمالكاوية لاضحاك الاهلاوية.

فلم نسمع احد يتكلم عن اى صفقة خطفها الزمالك من الاهلى..وتسابق الجميع فى سرد وروعة طريقة امضاءات احمد حسن الصعيدى والكبير للاهلى..وبراعة الصفقات..كما اتوجه الى مسئولى الزمالك واقول.. هل اى صفقة تأتى الزمالك لابد ان تأتى بهذه الطريقة.

لا اعلم..ربما جاء خبر اجوجو ليثلج صدرى قليلا من هم ومشاكل وقرف الاحباطات المتتالية.. حتى وان لم يصل..فاننى فخور بالزمالك وتشجيع الزمالك..وليذهب للجحيم من يعتقد ان اللعب على وتر احباط الزمالك هو الطريقة المثلى للوصول لفئة حمراء من المجتمع.

الان جاء اجوجو..وصل..وحيمضى..وحيلعب..وسيبدع..وصلت القاطرة البشرية اجوجو..وصل للابداع بإذن الله..جاء دورك يا اجوجو..لتثبت ان كل فيلم الوصول اليك كان يستاهل كل هذا الاحباط..وكل هذا الابداع فى حسم الصفقة..التى تمت بطريقة غريبة فعلا..واتمنى ان من وصل فعلا هو انت..فربما استيقظ صباحا فأجد انه ماسك..ومن تحته..عدلى القيعى..صباحو عسل ..اجوجو وصل..شكرا لكل من ساهم فى انجاح الفيلم!!

ملحوظة:
الكاتب غير مسئول عن تشابه بعض اشخاص فيلم الطريق الى اجوجو بفيلم الطريق الى ايلات
فلقد قام بدور القطان..السيد احمد سويلم
والقائد..عباس
والضفادع البشرية..مجلس ادارة النادى
قام بدور الرصيف الحربى..خالد طلعت
وقام بدور ياريتنى كنت معاهم..متشوقوا الكرسى الرئاسى
قام بدور علاء مرسى..وانا مصرى زيكم ماقلتوليش ليه..جماهير نادى الزمالك
وقام بدور مادلين طبر.. ..........
كل الشكر لكل من شارك فى انجاح الفيلم.. بقيادة موظف الفيز اللى زهق من اجوجو جه اجوجو راح
والسادة فاتحوا مطار القاهرة لصفقاتنا

هههههههههههههههه
حلو الفيلم ده ياباشمهندس
بس كل الحرب دى علشان تيجبوا اجوجو امال لوكنتم هتجيبوا ذيدان ولا هنرى كنتم عملتم ايه؟؟؟؟؟؟؟؟؟
مع ان فى جمله فى موضوعك ده استوقفتنى جدا وهى...
فاسم الزمالك سيضيف لاجوجو..اكبر من ان يقف الزمالك على لاعب!! ههههه
لا أقصد الاستهزاء والله بس ده لو صحيح كنتم مصريين عليه قوى كده ليه؟؟؟؟؟؟؟

و للعلم الا هلى لا بياخد صفقات من حد ولا بيتريق على حد مش محتاجين اصلا
ده كان من باب الدعابه ليس اكثر بس مافيش مانع تفكروا فيه
وطبعا مافيش زعل ياباشمهندس دى حرية رأى

حتشبسوت

فعلا وانا ماشي في شارع الجمهوريه لقيت حاجه غريبه الفيلم معروض في السينما اجوجو رايح جاى اخراج ممدوح عباس.
وطبعا الزمالك اللى مضيعه الفتاكه اللى بيتعامل بيها مجلس الادارة
كل واحد شايفه نفسه اللى مفيش زيه وعمالين يخترعوا في ناس.
المهم:-

اقتباس :: لا بياخد صفقات من حد ولا بيتريق على حد مش محتاجين اصلا
ده كان من باب الدعابه ليس اكثر بس مافيش مانع تفكروا فيه

هو انتى بتتكلم عن الاهلى القطرى ولا السعودى ولا الاماراتى ولامين
بس اكيد مش هاله بتاعتنا.
ال مش محتاجين ال سلملى على العواجيز.

سيادة الكينج اوف احفاد فراعنة كافيه
بعد التحية:.
من فضل سعادتكم حرية الراي مكفولة للجميع وياريت سعادتك تبطل تترايق علي اي حد حتي لو كان اهلاوي .

الملكة(queen) حتشبسوت ( مكتبتش حاجة تانية ) طبعا الزمالك هيضيفلة ده حتي لو لعب في مياه البحيرة هتضيفلة مش الزمالك
وبعدين مين زيدان ومين هنري وبعدين انت كتبتي حاجة مش فاهمة فهميهاني
وهيه
للعلم الا هلى لا بياخد صفقات من حد ولا بيتريق على حد مش محتاجين اصلاده كان من باب الدعابه ليس اكثر بس مافيش مانع تفكروا في

مش هزعل بردة ودي حرية الراي
ونحن هنا اكفل الراي والراي الاخر
مع تحيات
كافيه احفاد الفراعنة
الحزب الوطني سابقا

اه نسيت كنت عايزة اقولك علي حاجة
عندي افلام من نفس النوعية كتير ابعتلك

لالالالالالالالالالالالالالالالالالالالالا الا الحزب الوطنى
احنا ااااااااه ديموقراطيه لكن مش حزب وطنى
بنتكلم عن شعراء السياسه انما مش بنشجع الفساء او الانحراف الاعلامى

ابعت وورينا الهمه
بس انا عايز تنزل بالافلام الاجنبي بتاعتك والله وحشانى
بس لما الفلاشه ترجه هتشوف النقل

اولا يابشمهندس الجملتين اللى انت مش فاهمهم فى كلامى منفصلين تماما مش ملتصقتين زى انت ماكتبتهم
بالنسبه للجمله الاولى والخاصه بالاهلى فكنت اقصدها تماما زى ماكتبتها كده
اما بالنسبه للجمله التانيه فكانت تعود على كلامى الاول عن الزمالك واللى ممكن يتفهم على انى بسخر منه وطبعا مااقصدش كده ومع انى اهلاويه حتى النخاع واسم الاهلى مش محتاج انى اتكلم عنه معروف للجميع طبعا ماضيا وحاضرا بس مش معنى كده انى اتكلم مش كويس على باقى الانديه اللى ليها منى كل الاحترام...
ده كان كل قصدى اللى اتمنى اكون وصلته كما يجب

وبعدين شكل قسم الرياضه ده هيعملنا مشاكل بقترح نشيله احسن
او يابشمهندس تعتزل الكتابه فيه علشان نفضل كده كويسيين بدل ماكل يوم والتانى كده تاتشات

حتشبسوت كتب:: وبعدين شكل قسم الرياضه ده هيعملنا مشاكل بقترح نشيله احسن
او يابشمهندس تعتزل الكتابه فيه علشان نفضل كده كويسيين بدل ماكل يوم والتانى كده تاتشات

من عنيا انت تامري
انا مش هعتزل قسم الرياضة بس انا هعتزل المنتدي كله